Прынамсі два крыжы былі зноўку паламаныя невядомымі асобамі ў Курапацкім лесе. Гэта заўважылі сябры партыі КХП-БНФ, якія наведаліся ўпарадкаваць урочышча перад сьвятам ушанаваньня памяці продкаў - Дзядамі.

“Працягваецца панаваньне сатаны ў душах шэрагу людзей, якія ненавідзяць Беларусь, нашу гісторыю, нашу гістарычную памяць, нас, нашых продкаў", - сказаў з гэтай нагоды ў інтэрвію "Радыё Свабоды" сакратар узгаданай партыі Валер Буйвал.

На тэрыторыі помніка гісторыі міжнароднага значэньня ў Курапатах ляжаць парэшткі ад 30 тыс. да 200 тыс. ахвяраў сталінскага тэрору.

Шмат разоў мемарыяльны комплекс апаганьвалі невядомыя, і толькі аднойчы злачынцаў злавілі (тут можна пабачыць здымак непаўнагадовых вандалаў. Аднак вандалаў амніставалі, а ўлетку органы ўнутраных справаў прыпынілі яшчэ адну крымінальную справу па факце зьнішчэньня шасьці помных крыжоў.

Глядзіце якія мерапрыемствы адбудуцца ў урочышчы Курапаты 29 кастрычніка і 1 лістапада.